328. எட்டு வழிச் சாலை!

'மக்கள் புரட்சி மையம்' என்ற அமைப்பு பல வருடங்களாக இருந்து வந்தாலும், அதன் நடவடிக்கைகள் தீவிரமடைந்தது கடந்த ஐந்து வருடங்களாகத்தான்.

தேர்தலில் முறையில் நம்பிக்கை இல்லாமல், மக்கள் புரட்சி மூலம்தான் அரசியல், சமுதாய மாற்றத்தை ஏற்படுத்த முடியும் என்ற கொள்கையுடன், இருபது வருடங்களுக்கு முன் தொடங்கப்பட்ட 'மக்கள் புரட்சி மையம்,' ஒரு தலைமறைவு இயக்கமாகச் செயல்பட்டு வந்தது.

அவ்வப்போது காவல் நிலையங்களைத் தாக்கி, துப்பாக்கிகளை எடுத்துக் கொண்டு போவது, ஏழை மக்களுக்கு எதிராகச் செயல்படுவதாகக் கருதப்பட்ட சில அரசியல் தலைவர்களையும், அதிகாரிகளையும் சுட்டுக் கொல்வது போன்ற செயல்களில், அந்த இயக்கம் ஈடுபட்டு வந்தது.

மக்கள் புரட்சி மையத்தின் ஆதரவாளர்கள் என்று சிலர் அவ்வப்போது கைது செய்யப்பட்டு விசாரிக்கப்பட்டாலும், முக்கியத் தலைவர்களின் பெயர்கள் மட்டுமே தெரிந்த நிலையில், அரசு இயந்திரத்தால், அந்த இயக்கத்தின் முக்கியத் தலைவர்களைக் கைது செய்ய முடியவில்லை.  

இடம் விட்டு இடம் மாறித் தலைமறைவு வாழ்க்கை வாழ்ந்த முக்கியத் தலைவர்கள், நாட்டின் வெவ்வேறு பகுதிகளில் எப்படியோ தொடர்புகள் ஏற்படுத்திக் கொண்டு, அவ்வப்போது தாக்குதல்களை நடத்தி வந்தனர்.

ஐந்து ஆண்டுகளுக்கு முன், அந்த இயக்கத்தின் தலைவராக சதீஷ் சந்திரா பொறுப்பேற்றதும், இயக்கத்தின் அணுகுமுறையில் ஒரு மாறுதல் ஏற்பட்டது. தனி மனிதர்கள் தாக்கப்படுவது அடியோடு நிறுத்தப்பட்டது. 

நாட்டின் சில பகுதிகளில், மக்களிடையே ரகசியமாகப் பிரசாரம் செய்து, மக்களைத் தேர்தல்களைப் புறக்கணிக்க வைப்பது, அரசாங்கத்தின் சில சட்டங்களுக்குக் கட்டுப்பட மறுத்து, அவற்றை வெளிப்படையாக மீறும்படி மக்களைத் தூண்டுவது, விவசாய நிலங்களில் தொழிற்சாலைகள் துவங்க அனுமதி கொடுக்கப்பட்டால், மக்களைப் போராட்டம் செய்ய வைத்துத் தொழிற்சாலை வேலைகளைத் துவங்க விடாமல் செய்வது என்று தங்கள் உத்தியை மாற்றிக் கொண்டது மக்கள் புரட்சி மையம்.

இந்தப் புதிய அணுகுமுறையால், மக்கள் புரட்சி மையத்துக்கு முன்பு இருந்த வன்முறை இயக்கம் என்ற பெயர் மாறியதுடன், மக்களிடையே நன்மதிப்பு ஏற்படவும் தொடங்கியது. 

மக்கள் புரட்சி மையத்தின் முக்கிய நிர்வாகிகளின் ரகசியக் கூட்டம் நடைபெற்றது.

செயல்படுத்த வேண்டிய திட்டங்களைப் பற்றி விரிவாகப் பேசி முடித்ததும், கூட்டம் நிறைவு பெறும் தருவாயில், "வேறு ஏதாவது விஷயம் உண்டா?" என்றார் சதீஷ் சந்திரா. 

"இருக்கிறது, தோழர் சதீஷ்!" என்றார் சோமா என்ற மூத்த உறுப்பினர். துவக்கத்திலிருந்தே இந்த இயக்கத்தில் இருப்பவர் என்ற முறையிலும், முந்தைய தலைவருக்கு நெருக்கமாக இருந்தவர் என்ற முறையிலும், அவர் சதீஷ் சந்திராவைப் பெயர் சொல்லி அழைத்துப் பேசக் கூடியவர்.  

"சொல்லுங்க, தோழரே!" என்றார் சதீஷ் சந்திரா. 

"எங்க ஏரியாவில, அரசாங்கம் எட்டு வழிச் சாலை போடப் போறேன்னு சொல்லிப் பல ஊர்கள்ள இருக்கற விவசாய நிலங்களை அழிக்கப் பாக்குது. எல்லா எதிர்ப்புகளையும் மீறி, டெண்டர் விட்டு கான்ட்ராக்ட் கொடுத்துட்டாங்க. கான்ட்ராக்ட் எடுத்திருக்கறவன் பெரிய ரவுடி. மந்திரிக்கு வேண்டியவன். அவனை நாம போட்டுத் தள்ளிட்டா, அப்புறம் அந்த வேலைக்கு கான்ட்ராக்ட் எடுக்க யாரும் முன் வர மாட்டாங்க. நிலத்தை இழக்கப் போறமேன்னு கதறிக்கிட்டிருக்கிற விவசாயிகளுக்கு நிம்மதி கிடைக்கும்!" என்றார் சோமா.

"தோழரே! யாரையும் கொல்லக் கூடாதுங்கற கொள்கையை நாம பின்பற்றிக்கிட்டிருக்கோம். எவ்வளவு மோசமான ஆளா இருந்தாலும், வேற வழிகள்ள போராடி அவனைத் தோற்கடிக்கணுமே தவிர, அவனைக் கொல்லக் கூடாது. வேற வழியில முயற்சி செஞ்சு, அந்த நிலங்களை அரசாங்கம் எடுக்க முடியாம பண்ணுவோம்!" என்றார் சதீஷ் சந்திரா.

"இல்லை, தோழர் சதீஷ்! நீங்க அனுமதிக்காட்டாலும், நான் இதை செய்யத்தான் போறேன். ஏழை விவசாயிகளைக் காப்பாத்த, எனக்கு வேற வழி தெரியல!" என்றார் சோமா, பிடிவாதமாக.

மற்ற தலைவர்கள் அதிர்ச்சியுடன் சதீஷ் சந்திராவைப் பார்க்க, அவர் மௌனமாக இருந்தார்.

"நான் அப்படி செஞ்சா, என்ன பண்ணுவீங்க? என்னைக் கொன்னுடுவீங்களா? யாரையும் கொல்லக் கூடாதுங்கறது உங்க கொள்கையாச்சே!" என்றார் சோமா, எகத்தாளமாக.

"தோழர் சோமா! நிச்சயமா உங்களை நான் கொல்ல மாட்டேன். உங்க முடிவைச் செயல்படுத்த அனுமதிக்கவும் மாட்டேன். இந்தப் பிரச்னையை அமைதியான போராட்டங்கள் மூலம் நானே தீர்க்கறேன். அதுவரையில, என் விருந்தாளியா, நீங்க இங்கேயே இருங்க!" என்ற சதீஷ் சந்திரா, அங்கிருந்த இருவரைப் பார்த்துக் கண்ணசைக்க, அவர்கள் சோமாவைப் பிடித்து, அருகில் இருந்த அறைக்குள் தள்ளிக் கதவைப் பூட்டினார்கள்.   

                                                                   அறத்துப்பால் 

  துறவறவியல் 

  அதிகாரம் 33     

  கொல்லாமை  

குறள் 328
நன்றாகும் ஆக்கம் பெரிதெனினும் சான்றோர்க்குக்
கொன்றாகும் ஆக்கங் கடை.

பொருள்:
கொலையால் பெரிய நன்மை கிடைக்கும் என்றாலும், சான்றோர்கள், கொல்லும் செயலை இழிவானதாகவே கருதுவார்கள்.

குறள் 329

குறள் 327

பொருட்பால்                                                                                       காமத்துப்பால்